दक्षिण अमेरिकेतील देश चिलीतील जंगलाला भीषण आग लागली आहे. मध्य चिलीमध्ये असणाऱ्या जंगलातील आग दाट लोकवस्तीच्या परिसरात पसरली. या घटनेत आतापर्यंत 46 जणांचा होरपळून मृत्यू झाला आहे. तर जवळपास 1100 घरे जळून खाक झाली आहेत. त्यासह मोठी आर्थिक हानी झाली आहे.

या आगीच्या घटनेबाबत चिलीच्या गृहमंत्री कॅरोलिना तोहा यांनी माहिती देताना सांगितले की, 'सध्या देशाच्या मध्यभागी असलेली आणि दक्षिणेकडील भागातील 92 जंगले आगीच्या भक्ष्यस्थानी पडली आहेत. त्यामुळे परिसरातील तापमानात कमालीची वाढ झाली आहे. या घटनेत बऱ्याच लोकांचा मृत्यू झाला आहे. आगीवर नियंत्रण मिळवण्यासाठी प्रयत्न सुरु आहे.'

या आगीबाबत महत्वाची माहिती अशी की, वालपरिसो भागात सर्वात भीषण आग लागली आहे. त्यामुळे अधिकाऱ्यांनी मदत कार्यात अडथळा येवू नये म्हणून नागरिकांना घराबाहेर न पडण्याची विनंती केली आहे. या घटनेतील जखमी नागरिकांसाठी वालपरिसो परिसरात तीन छावण्याही उभारण्यात आल्या आहेत.

गृहमंत्री कॅरोलिना तोहा यांनी पुढे सांगितले की, 'क्विल्पु आणि व्हिला अलेमाना शहरांजवळ लागलेल्या आगीमुळे 8,000 हेक्टर जमीनीवरील पिके नष्ट झाली आहेत. विना डेल मारच्या किनारपट्टीवरील रिसॉर्ट शहराला इतर शहरांपेक्षा जास्त धोका आहे. या शहराच्या पूर्वेकडील भागात असलेल्या व्हिला इंडिपेंडेनियामध्ये घरांचे मोठे नुकसान झाले आहे.

अग्निशमन दलाचे जवान 19 हेलिकॉप्टर आणि इतर वाहनांच्या साह्याने आग विझवण्याचे काम करत आहेत. मात्र बहुतांशी प्रभावीत भागात बचाव पथकाला अजूनही पोहोचता आलेले नाही. त्यामुळे आग आणखी भडकत चालली आहे. त्यामुळे जीवीतहानी वाढण्याची शक्यता वर्तविन्यात येत आहे.